شقو اكىمى دانيال احمەتوۆ كوروناۆيرۋستان ساۋىعىپ شىققان ءارى انتيدەنەسى بار ادامداردىڭ قان پلازماسىنان جيناقتالعان بانكتى 19 قىركۇيەككە دەيىن اشۋدى تاپسىردى.
ايماق باسشىسى بانكتە كەم دەگەندە 1000 دوزا بولۋى كەرەكتىگىن اتاپ ءوتتى.
«ءبىز قازان ايىنداعى كوروناۆيرۋستىڭ ەكىنشى تولقىنىنا دايىن بولۋىمىز قاجەت. قازىردەن باستاپ پلازما بانكىن قۇرۋ ءۇشىن ءتيىستى جۇمىستاردى اتقارۋ كەرەك. شىعىس قازاقستاندا 4 409 ادام كوروناۆيرۋستىق ينفەكسيامەن اۋىرىپ، جازىلدى. ول ادامداردىڭ قان پلازماسى ارقىلى وزگە جانداردىڭ اۋرۋدان ساۋىعىپ كەتۋىنە كومەك بەرە الامىز»، - دەدى شقو اكىمى دانيال احمەتوۆ.
ونىڭ ايتۋىنشا، پلازما بانكىن قۇرۋعا جەدەل تۇردە كىرىسۋ كەرەك. بۇگىنگى كۇنى مەديسينالىق مەكەمەلەردەگى باس دارىگەرلەر مەن اكىمدەردىڭ باستى مىندەتى - ءوڭىر تۇرعىندارىنا قان پلازماسىن تاپسىرۋدىڭ ماڭىزىن ءتۇسىندىرۋ.
ەستەرىڭىزگە سالا كەتەيىك، بۇگىنگى كۇنى شقو-داعى مەديسينالىق مەكەمەلەر ۇزدىك تەحنيكالىق جابدىقتارمەن قامتاماسىز ەتىلگەن. 27 اۋرۋحانا، ونىڭ باسىم بولىگى اۋداندىق اۋرۋحانالاردا ورتاشا ەسەپپەن 5 كونسەنتراتوردان بار ەكەنىن ايتا كەتكەن ورىندى. شىعىسقازاقستاندىق دارىگەرلەرمەن COVID-19 كۇرەسۋدەگى تاجىريبەلەرىمەن بولىسكەن تاتارستان رەسپۋبليكاسىنىڭ دارىگەرلەرى ءبىزدىڭ ستاسيونارلاردىڭ مەديسينالىق پرەپاراتتارمەن جابدىقتالۋىنا وڭ باعالارىن بەردى.
ايماق باسشىسى وبلىس ماۋسىمدىق اۋرۋلارعا دايىن ەكەنىن اتاپ ءوتتى. ماسەلەن، تۇماۋعا قارسى ۆاكسينا ەگۋ جۇمىستارىنا دايىندىق جۇرگىزىلۋدە. وبلىستاعى مەديسينالىق مەكەمەلەرگە 20 000 ۆاكسينا ساتىپ الىپ، جەتكىزۋ جوسپارلانۋدا. تەگىن ۆاكسينا وسال توپتاعى تۇرعىندارعا سالىنادى.
پىكىر قالدىرۋ